Ceel-Barde,(WNT):-Ciidamo Ethiopian ah oo shalay soo gaaray degmada Ceel-barde ee Gobolka bakool ayaa la sheegay in halkaasi ka qab qabteen dad Rayid ah.

Ciidamada ayaa howlgalkaasi la xaqiijiyay in ay ku kaxeysteen Hooyo iyo 4-Carruur ah oo ay dhashay isla markaana la sheegay in ay ula dhaqaaqeen dhanka dhulka ismaamulka Soomaalida Ethiopia.

Dadka deegaanka ayaa sheegay in arintaasi cabsi xoogan ku abuurtay isla markaan aysan garan karin howgalkaasi ay wadaan Ciidamada Ethiopia.

Saraakiil ka tirsan dowlada KMG ah oo arintaasi wax laga waydiiyay ayaa beeniyay wax ciidamo Ethiopian ah ku sugan yihiin degmada Ceel-barde ee Gobolka Bakool.

Dhinaca kalena saraakiil Ethiopian ah iyo kuwo soomaali ah ayaa la sheegay in xalay kulamo xiriir ah ku lahayeen degmada Ceel-barde kaasi oo aan ujeedkiisa la ogeyn.

Balse wararka ayaa sheegay in ay ka wada hadleen sidii ciidamada Soomaalida ee degmadaasi ku sugan ugu diyaar garoobi lahaayen weeraro ay ku qaadaan gobolada Bay iyo Bakool.

Xafiiska Wararka Waayaha.net,Muqdisho.