Laascaanood,(WNT):-Ciidamada amaanka ee maamulka la baxay Somaliland ayaa xabsiga u taxaabay dad aad u farabadan oo shalay galinkii dambe dibad bax ka dhigay magaalada laas-caanood ee xarunta Gobolka Sool.

Dadka ciidamada amaanka gacanta ku dhigeen ayaa la sheegay in ay gaarayaan ku dhawaad 70-ruux isla markaana si weyn dibad baxaasi uga qeyb qaadanayay.

Saraakiisha amaanka ee maamulka somaliland ayaa sheegay in dadkaasi haatan ku jiraan xabsi isla markaana baaritaano kala duwan lagu hayo.

Dadka dibad baxa dhigay ayaa ahaa kuwo si weyn uga soo horjeeday Baaritaano la sheegay in ciidamada amaanka ka sameeyeen dugsiyo lagu barto Qur'aanka oo ku yaala magaalada laas-caanood,taasi oo keentay in xabsiga u taxaabaan tiro macalimiin ah.

Inta la xaqiijiyay dibad baxii shalay ka dhacay magaalada Laas-caanood waxaa ku geeriyooday hal ruux oo ahaa oday Waayeel ah kadib markii ay waxyeelo ka soo gaartay isku dhicii dhex maray dibad baxayaasha iyo ciidamada amaanka.

Xaalada deegaankaasi ayaa saaka laga soo sheegayaa in ay tahay mid aad u dagan isla markaana wali laga dareemayo raadadkii uu reebay dibad baxii shalay ka dhacay halkaasi.

Xafiiska Wararka Waayaha.net,Muqdisho.