Gudiga madaxa banaan ee soo diyaariyey Dastuurka qabyo qoraalka ah ee Soomaaliya ayaa weli dood ka qaba inuu dasuurku dhamays tirmay,waxayna cabasho ka muujiyey fara gelin ay sheegeen in xukuumadda KMG ahi ay howshooda ku samaysay.

Gudoomiyaha gudiga Cabdilaahi Xasan Jaamac ayaa sheegay in mas’uuliyiinta sare ee dowladu ay ku wargeliyeen in nuqulka kama danbeysta ah ee dastuurka ay gudiga farsamo ee dhowaan saxiixeyaashu ku heshiiyeen uu soo saari doono.

Arintaas ayuu ku tilmaamay inay tahay mid aan sharciga waafaqsanayn maadaama sida sharciga ahi ay tahay in marka ay gudiga madaxa banaani qoraalka Dastuurka dhameeyaan ay horgeeyaan odayaasha dhaqanka iyo culimaa’uddiinka.

” Waxay noo sheegeen in nuqulka kama danbeysta ah ay soo diyaariyeen gudiga farsamo, dhamaam bogagiisana ay ku saxiixan yihiin fuliyeyaasha Roadmapka, iyadoo naloo sheegay in aanan waxba ka bedeli karin ” ayuu yiri C/llaahi Xasan Jaamac.

C/llaahi Xasan Jaamac  ayaa mar la weydiiyey talaabada ay qaadanayaan ayuu sheegay in ay go’aan ku gaareen inaysan culimaa’uddiinka iyo madaxda dhaqanka horgeyn nuqul aan ahayn kii iyagu horay u diyaariyeen.

” Gudigu markii uu dhinac walba ka eegay wuxuu isla gartay in nuqulkaas aysan iyagu qaadin maadaama uu yahay mid aan sharci ahayn islamarkaana aysan horgeyn culimada iyo odayaasha dhaqanka “. Ayuu yiri markale C/llaahi Xasan Jamac.

Kullankii lagu qabtay magaalada Addis-ababa ee xarunta dalka Ethiopia kolkii saxiixaya geeddi socodka nabaddu heshiiskii ay saxiixeen ayaa waxaa ka mid ahaa waxyaabihii lagu heshiiyey in guddiga dastuurka waqtigiisu dhamaaday maadaama ay dastuurka soo gudibyeen, waxaana halkaasi lagu magacaabay gudi farso oo hoos imaanaya wasiirka dastuurka,waxaana arrintaasi ka biyo diiday gudii hore ee dastuurka, ilaa haddana weli doodooduna taagan tahay.

Xafiiska wararka Waayaha.net